ESTRUTURA DA PROBA

O exame constará de dúas opcións como nas anteriores convocatorias (opción A e opción B) e cada estudante terá que elixir unha delas sen que poida mesturar preguntas dunha opción coas da outra. Cada opción constará de tres exercicios, un teórico, un para relacionar e contextualizar autores/as e un no que o estudante deberá realizar unha análise literaria dun fragmento ou poema pertencente a unha das obras de lectura obrigatorias.

1. Tema (2 puntos).

Unha pregunta teórica onde o estudante deberá desenvolver un tema da materia de Literatura Universal

Ex.: Desenvolva o seguinte tema: A lírica do amor no Renacemento.

 2. Relacionar e contextualizar (1 punto).

O estudante deberá relacionar 5 autores/as coas súas obras e períodos literarios nos que se contextualizan (0.20 por cada resposta acertada que só puntuará no caso de que a relación entre os tres elementos sexa correcta).

Ex.:

A Ilíada — Homero    — Literatura grega

O Tartufo — Molière  — Teatro clásico europeo

Contos fantásticos— ETA Hoffmann — Romanticismo

Madame Bovary— Flaubert — Realismo

O vello e o mar — Hemingway — Xeración perdida da literatura norteamericana

3. Comentario de texto guiado (7 puntos)

Neste exercicio o alumnado deberá responder cuestións teóricas e históricas sobre a interpretación do contido e a forma dunha obra, a partir dun fragmento ou poema da mesma. Os fragmentos ou poemas sobre os que versarán as preguntas ou partes deste exercicio procederán de obras fundamentais da literatura occidental, expostas na lista de lecturas obrigatorias.

Así pois este exercicio consistirá na redacción globalizada dun comentario literario no que se desenvolverán polo menos as seguintes cuestións:

1. Exposición sobre a época e movemento literario no que se encadra o autor e a súa produción literaria (1 punto).

2. Exposición sobre o autor e a súa produción literaria atendendo á obra seleccionada (1 punto).

3. Detección e exposición do tema principal do fragmento. Sentido do texto, tratamento dos personaxes, relación do texto coa totalidade da obra á que pertence, expresión da voz poética (se se trata dun poema) etc. (2 puntos).

 4. Exposición sobre os aspectos formais do texto (estrutura, técnicas narrativas etc. ou en poesía: estilo, métrica, recursos retóricos etc.), explicando as funcións que os trazos detectados cumpren dentro do fragmento ou poema proposto (1,5 puntos).

 5. Comentario crítico e persoal sobre o contido e expresión do fragmento e da obra á que pertence. Cualificarase positivamente tamén a relación que se estableza, de forma razoada, con aspectos e conflitos da nosa sociedade actual, a universalidade e/ou actualidade da obra, así como a relación que poida ter a obra con outros produtos artísticos (obras musicais, teatrais, cinematográficas, artes plásticas etc.) (0,5 punto).

 6. Redacción do comentario. Valorarase ata un punto a precisión e claridade da redacción así como unha argumentación ben estruturada (1 punto).



.